Orasyon (Mano Po)

Orasyon (Mano Po) lyrics - Asin

Ilang saglit na lamang
Ang sikat ng araw
Papantay sa kapaligiran
Kay gandang pagmasdan
Ang ibon at kulisap nagsasagutan
Sa tunog ng kampanang kanilang sinasabayan

Ang mga bata naglalaro sa bakuran
Dahan dahang nagliligpit ng kanilang mga laruan
At papanhik sila ng bahay
Doon ay madadatnan
Ang lolo at lola
At mga mahal na magulang

Alas-sais na ng hapon
Oras ng orasyon
Tahimik sa bukid
Habang nagdidilim ang paligid
At ang maganda kong mailarawan
Ay ang pagmano sa magulang
Sa lolo, sa lola tanda ng paggalang

Mano po sa inyo
Ang sambit ng mga bata
Sabay hawak sa kamay ng matatanda
Mano po inay, mano po itay
Kami ay natutuwa sa simpleng takbo ng buhay

Ang kaugaliang aking nakita
Sana'y manatiling isang magandang halimbawa
Ito'y isang kaugalian na sana'y pag-ingatan
Hiyas ng kabataan
Sana'y pangalagaan

Mano po sa inyo
Ang sambit ng mga bata
Sabay hawak sa kamay ng matatanda
Mano po inay, mano po itay
Kami ay natutuwa sa simpleng takbo ng buhay