Masubo matuod ang dili angayan
Provincial jail ang amon ginsudlan
Pader nagalibot, sa kilid magtimbang
Rehas nga salsalon, ang amon pwertahan
Ang gintunaan sang amon pagpreso,
May yara pamuno, pamatay sang tawo
May yara holdaper, kawatan sa bangko
May yara nga smuggler, kontra sa gobyerno
Alas-siete sang aga, kami ang mamahaw,
Isa ka pandesal, taho nga malus-aw,
Ang luha sa amon mata naga kalaw-kalaw,
Bangod sadtong taho, sarang mapanghinaw
Alas-onse impunto, kami ang mapila,
Makadto sa kitchen, makuha panyaga,
Bugas nga NGA, wala mapili-i
Bangod sang kitchen boy, matamad magkoti
Ang amon nga utan, ginulot nga langka,
Tinuktok nga tangkong, bisan asin wala,
Samtang nagakaon, gatulo ang luha,
Daw ano kasubo, kung imo makita
Sabado, Domingo, kami wala obra,
Kami nagahulat sang amon bisita
Maayo lang iya ang may mga asawa,
Kay may nagadul-ong sang pagkaon nila
Kami amon iya nga mga sultero,
Nagasulusandig sa pader nga bato
Mag-abot na gani ang amon amigo,
Dayon kulukadlaw, Pepsi, sigarilyo
Lunes pagka-aga, kami ang bistahon
Sa kasa Gobyerno ang amon padulong,
Mag-abot na gani ang senyor taghukom
Dayon tililindog pati tumalambong
Ang makalulu-oy, kaming mga ultimo
Nagahilibi-on, walay abogado
Maayo lang iya ang may isa ka libo
Yara ang abogado, matabang sa imo
Sang mabasahan na ang amon sentensya,
Dyes disi-syete, cadena perpetua
Daw ano kasubo, tulukon sang mata
Daw ano kapait sang amon sentensya
Sang natapos na ang amon asunto,
Kami ang nanaog, sa kasa gobyerno
Sarado sang posas, ang wala kag tuo,
Daw ano kasubo, kung makita nimo
Samtang nagalakat sa tunga sang dalan,
Ang gwardya naga-ubay sa kilid magtimbang
Kami mapa-uli sa amon puluy-an
Karsel nga mapi-ot ang amon pagasudlan
O' mga amigo nga yara sa sa guwa,
Indi gid maghimo sang mortal nga sala,
Kami amon iya nga yari sa kuta,
Madugay nga tinuig wala maka-guwa
Madugay nga tinuig wala maka-guwa...